TURA: South Garo Hills a·jao Dapgre-oni Dana Adugre-ona dakanggipa ramako matchote tarija ine ia ramako tarina contract man·gipa M/s CCL Limited company-ni kosako Nokrek Area Development Committee (NADC), a·dokni Deputy Chief Minister aro PWD (Roads) Minister Prestone Tynsong-na badi ka·doangaha.
NADC-ni secretary Chegan N Marak-ni parakatani gitade, ia ramako tariani bidingo Dana Adugre songni A·king Nokma John Ch Marak, RTI ka·e am·sandion, ia ramako tarina gita M/s CCL Ltd company-na 2017 bilsini December 17 tarikon work order-ko on·aha ine ma·sina man·aha.
“Ia ramako tarina gita gong kror 6 tangkarangko sorkari chame on·aha aro kamko 2018 bilsini April jao a·bachengahachim indiba kamrangko matchotgija 2019 bilsini April jaon galchipaiaha. Ia company, German Technology-ni kamrangkode matchotahachim indiba black topping-kode a·bachengsrangkuja. RTI ka·e am·sandion, ia company gong 4,08,79,092 tangkarangko oke ra·aha ine ma·sina man·aha indiba kamrangkode matchotgija galchipaiaha,” ine NADC-ni secretary, PWD (Roads) Minister-na badi ka·e sedoataha.
Chokpot-oni Tura-ona re·ruraenggipa manderangna ia rama dilsasan dongaiani a·sel da·o ramako re·ruraenggipa manderang neng·nikanirangko chagrongna nangtokengaha ine janapatengon, ia ramao dam 15 slat culvert aro dam 5 retaining wall-rangko rikna miksongani dongachim indiba ia ramako tarigipa company, fam 9 culvert aro retaining wall-kode damsana riksrangkuja ine Marak parakataha.
“Ia ramako tarigipa M/s CCL Ltd company, bilsibongana ia ramako matchotgija galchipe donaha aro da·onan kamrangko a·bachengpiltaikujaenga. Dapgre-oni Dana Adugre-ona Km 3 ong·gipa ramako black topping on·gija donchipengani a·sel Chokpot-oni Tura-ona dakanggipa ramao pangchakenggipa dam 12 songni manderang neng·nikanirangko chagrongna nangtokengaha,” ine NADC-ni secretary, PWD Minister Prestone Tynsong-na badi ka·doataha.
