TURA: Meghalaya a∙dokni State Reservation Policy (SRP)-ko gital dake nipiltaianio, dingtang dingtang dolrangni aro a∙doko songdongenggipa manderangni nangnikani aro chanchianirangkoba Expert Committee ra∙engani gimin ia 1972 bilsini State Reservation Policy-ko skango gitan donaichina aro taridapjachina gita Tura Napak Mahari Union (TNMU)-ba dabiangaha.
Manderangni janggi tangani gadang, lekka-porani gadang, sorkario kam ka∙ani gadang aro pilakni gitan A∙chikrang ja·manchakkuengani gimin State Reservation Policy-ko taridapgija skango gitan apsan niamko ja∙rikangkuna nanga ine TNMU, Expert Committee-na sedoatgipa chittio parakataha.
Meghalaya a·dokko man·aoni bilsi 50 gappilahaoba da∙alonan A∙chikrangna State Reservation Policy-ni mongsonggipa miksonganikon chu·sokatkujaenga ineba TNMU parakataha.
State Reservation Policy-ko mandeni jelbra jelsuanio pangchake a·dokni gitcham dilgiparang taria ong·ja indiba jatni janggi tangani gadang aro ja·manchakaniko niesa tariaha ine janapatengon, Assam a·dokni somoionin Shillong songjinmara skotong songjinma ong·e Khasi aro Jaintiarangde pilakni gitan janggi tangani gadangrang nambata aro cholrangko man·bata ine TNMU-ni dilgiparang parakataha.
“Uni gimin a·dokni Reservation Policy-ara dingtang dingtang jatrangni gisepo apsan janggi tanganiko man·china aro bak rengsiko man·china gitasa ra·gatahani gimin a·doko songdongenggipa dingtang dingtang jatrangni namgnina ia Reservation Policy-ko taridapna nangja aro skango ja·rikbaenggipa apsan niamkon ja·rikangkuna nanga ine Tura Napak Mahari Union parakataha.