TURA: Garo Hills-ni Sonja Wildlife Rescue Centre-o donenggipa hurorangko Ri Bhoi a·jani Umtrew-o gital kulienggipa State Zoo-ona ra·jitangna sorkarini manchienganiko A·chik Holistic Awakening Movement (AHAM) jegalataha.
Iani bidingo a·dokni Chief Minister Conrad K Sangma-na sedoatengon, Meghalaya a·dokni saliram jolo donggipa matburingrangara namen dingtangmanchagipa ong·a aro Garo Hills-ni hurorangko dingtang biapona ra·jitanggenchimode ian hurorangna nangchakeaniko ra·banaba gnang ine AHAM-ni president George Prince Cheran Momin parakataha.
“Meghalaya a·dokni saliram jolo donggipa hurorangara namen dingtangmanchagipa ong·a aro ia hurorangara Garo Hills-ni dikbegipa buringrango donggiparangsa ong·ani gimin ia hurorangko zoo-ona ra·anggenchimode uamangni dakbewalrangba dingtangnaba gnang,” ine Momin parakataha.
AHAM president-ni parakatani gitade, International Union for Conservation of Nature (IUCN)-ni dongimin niamrangon gimaangenggipa matburingrangko uamangni dongchakram biaprangon donchina u·iatmanahani gimin saliramni hurorangko Guwahati Zoo aro Lucknow Zoo-ni hurorang baksa te·srena manchianiara niamo gita ong·jaengachim.
“1972-ni Indian Wildlife Protection Act-oba matburingrangko aro uamangni dongchakgipa biaprangko chel·chakchina niamko donahani gimin Garo Hills-ni hurorangko dingtang biapona ra·jitanganiara ia niamrangko pe·ani gitaba ong·enga,” ine Momin parakataha.
Hurorangni gamchataniko A·chikrang chengonin ma·sigiparang ong·a ine janapatengon, iani giminsa A·chik pagitcham ma·gitchamrang hurorangko ‘A·song Nokgipa, Buring Nokgipa aro Chiga Nokgipa’ ine mingaha ine AHAM-ni president parakataha.
