TURA: Re·anggipa antionin mikkarang jimbee waangahani a·sel Robibar walo, South Garo Hills a·jani Siju jolo donggipa Darang Boldak songni ramako chi man·angaha aro uandaken da·o Williamnagar-oni Nongalbibra gita Baghmara-ona aro Baghmara-oni Siju gita Nongalbibra-ona re·ruraaniko champengata gita ong·aha.
Ia ramara East Garo Hills aro South Garo Hills a·jako nangdimeatgipa National Highway (NH-62) ramani bak ong·achim aro da·o ia ramako Darang Boldak songo chi man·angahani a·sel a·ja damgnini gisepo songre songgabatna nanggipa manderangna neng·nikaniko ra·baani gita ong·aha.
Iani bidingo South Garo Hills a·jani Superintendent of Police (SP) Shailendra Bamaniya-o sing·sandiaton, chi pe·anggipa ramani bakara Darang Boldak songo ong·a aro ian Nongalbibra police station-oni km 15-mang chel·ao donggipa biap ong·a ine parakataha.
Mikkarang jimbee waangani ja·man Simsang chibima dal·bae ia ramako chi pe·angaha aro da·o ia songko ni mripahani a·sel ia songona re·angna namen neng·ani ong·engaha ineba SP parakataha.
“Chirang ta·rakengani gimin chonchongipa garirangde ia rama gita re·na man·jaengaha indiba Sumo, Bolero aro uandake dal·dalgipa garirangde re·na man·engkua. Mikkarang komiangahaosa ia ramako tarina man·aignok,” ine Bamaniya parakataha.
Batanggimin 2022 bilsimangoba ia apsan jolrangon mikkarang jime waangani ja·man rama jal·langrangko aro nok-jamrangko chi man·angahachim aro untalan Darang Boldak aro uandakgipa dingtang dingtang songni manderang, rama jal·langrang dongjae da·o gita wachini somoirangode Simsang chibimako re·batanio neng·nikanirangko chagrongna nangtokengachim.
Ia rama jal·langrangko ka·sinsin tarina a·bachengahaoba da·o wachini somoio sokbataiahaon, mikkarang jime waangani ja·man ia ramako chi man·angahani a·sel songni manderangsan ong·gija, ia rama gita re·ruraenggipa pilakan neng·nikanirangko chagrongna nangengahachim.
