SHILLONG: Meghalaya a·dokni State Reservation Policy (SRP)-ko dangtapgija skango gitan donaichina Tura-ni MDC aro BJP-ni state vice president Bernard N Marak-ba didiataha.
“Da·o dipet 1972 bilsini Reservation Policy-an a·dokni mongsonggipa jatgittamna namtiktakengani gimin anga an·tangde ia Reservation Policy-ko gital dake nipiltaianiko nangnikjaenga. Reservation Policy-o A·chikrangna 40 percent-ko nangchongmota. Garo Hills-oni chief minister bang·en ong·angahaoba uamangoni darangba Garo Hills-o lekka porani gadangko namdapatna aro skul nokrangko taridape on·na gisiko nangjaha,” ine Marak parakataha.
Tura MDC-ni aganani gitade, Garo Hills-ni bang·bata manderangan kangal cholgrirangsa ong·a aro diltugipa songrangonisa ong·ani gimin chatro chatrirang, chubata gadangni lekka porako ra·na gita reservation policy-on pangchakna nangtokengachim.
Roster system-ni bidingo High Court-ni rai on·ani ja·mansa iani bidingo manderang mikrakna a·bachengaha ineba ua aganaha.
“A·chikrangni man·na nangkuenggipa bak rengsi da·o bang·dugaahani giminsa chinga an·tangtangni man·na nangkuenggipa bak rengsirangko dabina a·bachengaha. Chingko jattangni chief minister-rang aro minister-rangan nichanggalaha maina uamang a·bachengoni simsaksogenchimode da·alo A·chikrang an·tangtangni bak rengsiko gimaatna nangjawachim,” ine Marak aganaha.
Reservation Policy-ko nipiltaina tik ka·ani a·selan a·doko songdongenggipa dingtang dingtang jatrangni gisepo meligrikgijaniko ra·baani gita ong·engahani gimin sorkari ta·raken maikoba dakna nanga ineba BJP-ni state vice president didiataha.
“Iako namatna gita ta·rake ja·kurangko de·jagenchimode ja·mano obostarang namjabatangnaba gnang,” ine Marak mikraksamsoataniko on·angaha.
