TURA: 1972 bilsini State Reservation Policy (SRP)-o Khasi-Jaintiarangna 40 percent aro Garorangna 40 percent-ko chamahaoba sorkarini kamrangko man·anio da·alonan Garorangde chu·gimik namgnirangko man·kujaenga ine Tura-ni gitcham MLA John Leslee K Sangma parakatenba, Reservation Policy-o Garorangna chamaniko 50 percent-ona bariatskachina SRP-ni Expert Committee-na sedoataha.
“1972 bilsini State Reservation Policy-o Khasi-Jaintiarangna 40 percent aro Garorangna 40 percent-ko chamahaoba employment data-ode sorkarini kamrangko Khasi-Jaintiarang 66.5 percent aro Garorang 33.5 percent-kosa man·kuenga ine mesokani donga,” ine Sangma, Expert Committee-na sedoatgipa chittio parakataha.
Mandeni jelbra jelsuanio pangchake reservation policy-ko tarichina dabianiko jegalatengon, “State Reservation Policy-o gipin 40 percent-ko man·enggipa manderangni dilgiparangde Garorangna 40 percent chamaniara bang·dugaenga ine Reservation Policy-ko gital dake nipiltaichina dabitokenga indiba anga saksa Garo jatko dilgipa ong·e iako raken jegalskaenga,” ine Tura-ni gitcham MLA parakataha.
SRP-ko gital dake nipiltaichina dabie Voice of the People’s Party (VPP) president-ni okumu chake jingjengatani ja·man ia Reservation Policy-ko nipiltaina gita sorkarini Expert Committee-ko songe on·ahani giminba ua suk ong·gijaniko parakataha.
“Expert Committee-ko songani bidingo sorkarini u·iataniko on·aniara ian sorkari ba Meghalaya a·doko songdongenggipa manderangni bilsi 52 ong·gipa Reservation Policy-ko nipilna nangnikani gimin ong·ja indiba politics-ni gita didianiko man·ahani giminsa ia Expert Committee-ko songani gita ong·aha,” ine Sangma parakataha.
Sangma-ni parakatani gitade, Garorang pilakni gitan Khasi aro Jaintiarangna bate ja·manchakbatengani gimin Indian Constitution-ni dongimin niamo pangchake Reservation Policy-chi chel·chakako man·na kragipa jat ong·a aro Reservation-o Garorangna 40 percent-ni pal 50 percent-ona ra·doatanian nambatgipa chol ong·enga.
“Meghalaya a·dokko man·na krenganio jak dongpagipa pilak jatrangni janggi tangani gadango pangchakesa a·dokko man·e on·dilgiparang Meghalaya a·dokni Job Reservation Policy-ko tariaha, uni giminsa Reservation Policy-ko dangtapjachina Garorang dabitokenga,” ine Tura-ni gitcham MLA talataniko on·angaha.
State Reservation Policy-ko gital dake nipiltaiani pal, a·doko songdongenggipa pilak jatrangni namgnina Roster System-ko dongnuani gri ong·atchina gitaba Sangma, Expert Committee-ko didiataha.