TURA: Ia 2024 bilsini SSLC aro HSSLC porikkako seanio Chokpot-o donggipa skulrangoni chu·sokanggipa chatro chatrirangna GSU Chokpot regional unit-ni gita Mongolbar salo, mande ra·pilskaaniko dakangaha.
SSLC porikkani result-o Top 20-o pass ka·gipa Lilian Christiano B Marak aro porikkao First Division man·e pass ka·gipa chatro chatrirangna ia salo GSU Chokpot regional unit-ni gita mande ra·pilskaaniko dakangaha.
Ia program-ko ong·atanio, Chokpot-ni MLA Sengchim Sangma, mongsonggipa sokgipa ong·e bakko ra·angaha aro ia tom·anio bak ra·gipa chatro chatrirangna didiani kattarangko aganangaha.
SSLC porikkao Top 20-o pass ka·anichi Chokpot jolni manderangna mikkim rasongko ra·baahani gimin Lillian Christiano B Marak-ko GSU-ni dilgiparang mittelpilangaha aro mikkangchiba iandake gisiko nange poraichina aro joltangnasan ong·aigija A·chik a·songna aro jatna mikkim rasongko ra·bachina gita gipin chatro chatrirangkoba didiangaha.