TURA: New Criminal Laws ba ong·gija dakgipa kamrangko champengna gital niamrangko ra·gatna siengahani gimin Mongolbar salo, Shillong-ni Meghalaya Administration Training Institute (MATI)-ni gita ‘New Criminal Code’-ni bidingo training program-ko Tura-ni Circuit House-o ong·atangaha.
Ia training program-ko ong·atanio Bharatiya Nyaya Sanhita (BNS) 2023, Bharatiya Nagarik Suraksha Sanhita (BNSS) 2023, aro Bharatiya Sakshya Adhiniyam (BSA) 2023-ni bidingo official-rangna agan-talate on·angaha.
Ia gital niamrangko July 1 tarik dipet Meghalaya a·doko a·bachengna siengahachim.
Ia training program-ko ong·atanio, Law Department-ni Under Secretary Shany N Sangma, ia minggittam Criminal Code-rangni gimin agan-talatanirangko on·angaha aro Bharatiya Nyaya Sanhita-ni bidingo West Garo Hills a·jani Public Prosecutor agan-talate on·angskaaha.
Ia Training program-ni gnigipa salo, Bharat Nagarik Suraksha Sanhita-ni bidingo Law Department-ni Under Secretary Shany N Sangma, agan-talate on·angkugen.
