TURA: Mongolbar salo, West Garo Hills a·jani District Legal Services Authority (DLSA), Meghalaya State Legal Services Authority (MSLSA) baksa nangrime, National Legal Services Authority-ni ning·o salsani Legal Awareness program-ko West Garo Hills a·jani Balamagre antio ong·atangaha.
Disaster Management Act 2005, Protection of Women from Domestic Violence Act, 2005 aro Free Legal Aid, Free Legal Services aro uandakgipa kamrangni bidingo cholgri ong·gipa manderangna talatanirangko on·na gita ia awareness program-ko ong·atangaha.
Ia program-ko ong·atanio, John Crownin Ch Sangma, Disaster Management Act 2005-ni bidingo agan-talatanirangko on·angengon, chi banani, a·a be·ani aro uandake ong·telaigipa a·selrangchi duko ga·akgipa manderangna ia Act-ni ning·o sorkari dakchakanirangko on·a aro a·sel ong·anio noksan ong·anirangko rikpilna gita dakchakanirangko on·a ine parakataha.
Protection of Women from Domestic Violence Act 2005-ni bidingo talate on·angskaengon, ian noko ka·saninggija dake jakkalako ba kal·ake roako man·gipa me·chikrangna dongimin Act ba niam ong·a ine Sangma aganenba, banoba iandake ka·saninggija dake jakkalani ba kal·ake roaniko man·genchimode sepangbatgipa police station ba protection officer-rangona aganena man·gen aro uni ja·man dos dakgipa mandeni kosako aino pangchake ja·kurangko de·na man·gen ine parakataha.
Free Legal Aid aro Free Legal Services-ni bidingo aganangskaengon, iandakgipa dakchakanirangko songsalo cholgri ong·gipa manderangna on·enga aro uandakgipa manderang, ainni gita dakchakanirangko indin ra·na man·a ine Sangma parakataha.
Mongolbar pringo mikkarang jimbee wagenchimoba Balamagre antiona anti cha·na re·bagipa manderang, ia program-o dongpae bak ra·angtokaha.