SHILLONG: Meghalaya a·doko songdongenggipa Khasi aro Garorangni gisepo ding·chaogrikaniko ra·bana jotton ka·aha ine matnangenba, a·dokni Education Minister Rakkam A Sangma-ni kosako Voice of the People’s Party (VPP), Mongolbar salo FIR ka·doangaha.
Adita salrangna skang, Lok Sabha election-na campaign ka·engmiting somoi, Meghalaya a·doko VPP bilona re·bagenchimode A·chikrangko a·rikgal jotton ka·gen ine Education Minister-ni agangipa video-ko social media-oniko niksoani ja·man Education Minister-ni kosako VPP-ni finance secretary Danny Langstieh, East Khasi Hills a·jani Superintendent of Police (SP) Sylvester Nongtnger-na FIR ka·doangaha.
FIR-ko ka·ani bidingo talate on·angengon, election-na campaign ka·engmiting somoio Education Minister-ni agangipa kattarangara dingtang dingtang jatrangni gisepo tom·tome janggi tanganiko nosto ka·na jotton ka·ani gita ong·aha aro ian dingtang dingtang jatrangni gisepo ra·chakna man·gijagipa kam ong·a ine Langstieh parakataha.
Iandake skatang mamingkoba chanchichenggija jatsani kosako aganprakaniara niamko pe·anisan ong·aija indiba a·doko dingtang dingtang jatrangni gisepo so·sojengjeng ong·aniko aro dinggrikaniko ra·bana cholrangba dongani gimin ian namen kenchakna nangani ong·a ine VPP-ni dilgipa parakataha.
Iani bidingo police-rangni gita maming ja·kurangko de·jaha ine janapatengon, “Anga saksa a·songo songdongpagipa ong·e aro VPP-ni membor ong·e, ia minister-ni kosako nanga gita ja·kurangko de·china nangko didienga,” ine Langstieh, Education Minister-ni kosako ka·gipa FIR-o parakataha.
Social media-o giproroenggipa video kakket ong·bebegenchimode, ua (Rakkam) an·tangni kamkosan wataigija niamo pangchake sastiko man·na nanggen ine adita salrangna skangsan, VPP-ni dilgiparang parakatahachim.
Ia video-ko uamang nikmanaha ine janapatengon, “Rakkam-ni kosako matnanganirang baditana kingking kakket ong·a chinga name am·sandina man·kujaenga indiba ian kakket ong·bebegenchimode ua saksa minister ong·e jatgnini kosako ding·chaogrikaniko ra·bana iandakgipa kattarangko agananiara namen kragijani ong·gen. Ian ong·na kragijanisan ong·aija indiba dosko dakgipani kamko ka·aniba ong·enga,” ine VPP-ni ku·wattimgipa Batskhem Myrboh aganahachim.