SHILLONG: Training-o skie ra·enba matchotgimin manderangna Budbar salo, Training of Rural Educated Youth for Self Employment in Farm Based Activities (TREYSEFA)-ni award-rangko a·dokni Agriculture & Farmers Welfare Minister Dr M Ampareen Lyngdoh-ni jakchi on·angaha.
Ia program-ko ong·atanio Agriculture Minister jinmana aganprakengon, “Anga an·tangde Agriculture-ni mande ong·pajaoba batanggimin bilsisana anga department-ko jako ra·e nirokengani gimin maikai ia department kamrangko ka·a, uarangni giminde bang·a bang·ja ma·sipaengaha,” ine aganaha.
Me·su samjakrangni dam rakbatroroengani gimin songbadrango seanirangko nikna man·enga ine janapatengon, “Me·su samjakrangni dam rakbatroroengon an·ching an·tangtangna cholko bikotna gita department-ko mangrakbatatna aro dingtang dingtang niamrangko ra·gatna nangenga. Je me·su samjakrangkon an·ching bree cha·enga, ia me·su samjakrangko an·ching biaptangtangko ge·e, uarangko palna sim·na aro an·tangtangba cha·na gita cholrangko tarina nanga,” ine Lyngdoh aganaha.
Pilakande sorkarini kamrangko ka·e cha·na cholrangko man·jawa ine janapatengon, ia susaenggipa a·gilsako gama ge·ani kamrangkoba an·tangtangna cholrangko tarichina gita Agriculture Minister, a·dokni chadamberangko didiangaha.
Training-o an·tangtangni skie ra·giminko gipinrangnaba skie on·skachinaba ua didiangaha.
Ia program-ko ong·atanio Agriculture Minister baksana Agriculture department-ni Secretary Isawanda Laloo, TREYSEFA 2023-24-ni gnigipa me·chik dolna seed money-koba suale on·angaha aro Upper Shillong-ni Basic Agriculture Training Centre (BATC)-ni gimn segipa lekkakoba oprake on·angjolaha.
