SHILLONG: Meghalaya a·dokni State Reservation Policy (SRP)-o 15 percent-ko General Category-na chamchina gita a·dokni Cabinet Minister AL Hek, Expert Committee-na ku·pattianiko on·ataha.
Reservation Policy-ko nipiltaina gita a·doko songdongenggipa manderang aro dingtang dingtang dolrangni ku·pattianirangko Expert Committee ra·engani gimin a·dokni Cabinet Minister AL Hek-ba ia ku·pattianirangko Expert Committee-na on·ataha.
Khasi-Jaintiarangna chamgimin 40 percent-oni 20 percent-ko Below Poverty Line (BPL) ba cholgri ong·batsranggipa apsan jatni manderangna chamenba, 20 percent-ko gipin Khasi-Jaintirangna chamchina gitaba Hek didiataha. Apsan daken, Garorangna chamgimin 40 percent-oni 20 percent-ko BPL nokdangrangna chamenba bangki 20 percent-ko obosta namkalgipa Garorangna chamchina a·dokni Cabinet Minister aro BJP-ni dilgipa, Expert Committee-ko didiataha.
Meghalaya a·dokni gipin Scheduled Tribe (ST) aro Scheduled Caste (SC)-rangna 5 percent-ko chamskachina gitaba Hek didiataha.
Da·o dipet a·dokni Reservation Policy-o Khasi-Jaintiarangna 40 percent, Garorangna 40 percent, gipin chonchongipa jatrangna 15 percent aro open category-na 5 percent-ko chamahachim ine nikna man·a.