TURA: Meghalaya Rights to Public Act 2020-ni bidingo agan-talate on·na gita Budbar salo, dingtangmancha awareness program-ko West Garo Hills a·jani DRDA Conference Hall-o ong·atangaha.
Meghalaya a·doko songdongenggipa manderangna dongimin somoi gita sorkarini kamrangko chu·sokate on·na nangani gimin sorkario kam ka·enggipa pilak manderangna agan-talate on·na gita ia awareness program-ko ong·atangaha.
Technical session-o Tura District Commerce & Industries Centre (DCIC)-ni Functional Manager Frederick A Sangma, Meghalaya Rights to Public Service Act-ni bidingo agan-talate on·angaha aro ia Act-ni ning·o Commission-ni on·enggipa kamrangni gimin talate on·angenba, Meghalaya State Public Service Delivery Portal aro Public Grievances Redressal (CPGRAMS), megPGRAMS aro gipin kamrangni giminba agan-talate on·angaha.
Ia awareness program-ko ong·atanio, Tura Horticulture-ni Assistant Director (Marketing) Sanyang A Sangma, MRTPS Act 2020-ni mongsonggipa miksongani aro niamrangni gimin agan-talate on·angskaaha.