SHILLONG: MPLAD scheme-ni tangka paisarangko jakkalsreta ine matnangahani gimin ‘RS Kharbani’ minggipa youtuber-ni kosako Rajya Sabha-ni MP WR Kharlukhi, Cyber Crime Police Station-o FIR ka·doangaha.
Iani bidingo kobor ra·timgipa manderangna talate on·angengon, uni kosako matnanganirangko sandirokna ua on·aigen aro an·tangni MP scheme-ko jakkalsreta ine sakkirangko mesokna man·genchimode ua MP-ni kamkoba watna man·aigen ine NPP-ni Rajya Sabha MP Kharlukhi parakataha.
“Angko tangka paisa jakkalsreta aro MP scheme-ni kamrangko ka·anio tangka paisarangko jakkalsreta ine matnangahani gimin ‘RS Kharbani’ minggipa youtuber-ni kosako anga cyber crime police station-o FIR ka·aha,” ine Kharlukhi aganaha.
MP scheme-ni tangka paisarangko jakkalsretaha ine sakkiko mesokna man·genchimode ua an·tangan sorkarina sedoatenba CBI-chi am·sandiatchina u·iatgen aro ua pattokoba dongna kusi ong·aigen ineba Kharlukhi parakataha.
“Na·simang songrangona re·ange sing·sandina gitaba man·aigen aro uamang kamrangko ka·ja indiba Kharlukhi-ni mandesa ka·a ine agangenchimode anga ua salon MP ong·aniko watgen,” ine Rajya Sabha MP, uni bimingko iandake ong·siatna jotton ka·gipa manderangni kosako badi ka·angkuaigen ine mikrakataniko on·angaha.
“Anga kamtango parake dakgipa ong·a aro ango bank account ge·gittam donga. Jeba angni account-rangko sandiroke nina man·aigen,” ine ua aganaha.
Politics-o uni kam ka·ani da·o bilsi 40 gapna am·pilengaha aro da·o ua kamtangoni neng·takna sipilengahaosa uni kosako iandake matnanganirang ong·kataha ineba Kharlukhi suk ong·gijaniko parakaha.
An·tangni MP scheme-ko man·ani bidingo talataniko on·angskaengon, ua 2022-23 bilsinasa MP scheme-ko man·aha maina Covid sajinmani somoiode MP scheme-rangko on·a dongjachim ine NPP-ni Rajya Sabha MP parakataha.
“Ua somoiode anga scheme-rangko nodal officer (deputy commissioner)-nasa recommend ka·ataia aro uasa ja·mano beneficiary-rangna tangka paisarangko on·na gita block development officer (BDO)-rangona watatskaaia. Indiba 2023-24 bilsiode kamrang dingtang ong·skaaha maina unode Delhi-ni Rural Develepment department-ni pal scheme-ko Parliament-onin district officer-rangna aro BDO-rangna joljol watatskaaiaha,” ine Kharlukhi aganaha.
2022-23 bilsina MP-ni scheme-ni ning·o chamatgipa gong crore bonga tangka chu·gimikkon ua jakkalaha indiba 2024 bilsinade Lok Sabha election dongani gimin da·osa beneficiary-rangona ba namgniko man·enggipa manderangona sokangaha ineba Kharlukhi talataniko on·angaha.