TURA: South West Garo Hills a·jao District Horticulture department-ni rikgimin Centre for Innovation for Sustainable Livelihood building-ko jakkalgija donchipenga ine matnangenba, ia centre-ko jolo songdongenggipa manderangni namgnina ta·raken chalaichina gita A·chik Holistic Awakening Movement (AHAM) Ampati unit, South West Garo Hills a·jani Deputy Commissioner-na lekka sedoangaha.
AHAM Ampati unit-ni parakatani gitade, ia building-ko bilsi gittamna skangan rikahachim indiba da·alonan ia building-ko kulichipgija donengachim.
“Ia biapo Horticulture-ni centre-ko rikaniara a·jani manderangna, mongsongbate game ge·e cha·enggipa manderangna ka·donganiko ra·baani gita ong·ahachim indiba da·alonan ia centre-ko kulichipgija donaniara a·jao namroro silroroaniko ra·baanio champengani gita ong·enga,” ine AHAM Ampati unit-ni dilgiparang parakataha.
Ia centre-ni namgnirangko man·na gita SWGH a·jani manderang aro mongsongbate game ge·e cha·giparang ka·donge nichaktokenga ine janapatengon, ia centre-ko ta·raken chalaina man·na gita ja·kurangko de·chakatchina AHAM-ni dilgiparang, South West Garo Hills a·jani Deputy Commissioner-ko didiataha.
