SHILLONG: Meghalaya a·doko Jal Jeevan Mission (JJM)-ni kamrangko ka·anio niamrangko ja·rikjaenga ine matnanganiko Public Health Engineering (PHE) department jegalataha.
“Garo Hills-ko man·chape Meghalaya a·dokni pilak biaprangon chinga dingtang dingtang songrangna ringani chirangko sokate on·na man·aha. Indake ong·genchimoba kamrang da·o dipet chu·gimik matchotsrangkujaengani gimin chinga kamrangko chu·sokatanio chagrongna nangenggipa dingtang dingtang neng·nikanirangko namatna jotton ka·enga,” ine Tura-ni PHE official saksa kobor ra·timgipana parakataha.
PHE official-ni parakatani gitade, JJM-ni kamrango chibisikrangko on·na jechakani, a·arangko ra·anio neng·nikani aro uandakgipa dingtang dingtang neng·nikanirangko department-ni manderang chagrongna nangenga aro iandakgipa neng·nikanirangko field engineer-rang namatna rakbee kamrangko ka·enga.
Dingtang dingtang neng·nikanirangko chagrongna nangengani a·selan mitam project-rangko matchotna gita somoiko nangenga aro iana contractor-rang somoirangko ra·dapna nangenga ineba ua aganaha.
“JJM-ni kamrangko matchotatanio chinga darang songrangkon watchanggalna nangnikjaenga, uni gimin ia kamrangko contractor-rang matchotgija galchipgen ine kenjachina chinga a·doko songdongenggipa manderangko didienga,” ine PHE official aganaha.
JJM scheme-ni bidingo manderang ma·sisrettokengani a·selsa matnanganirang ong·katenga ineba ua talataniko on·angaha.
“Iandakgipa ra·bianirangko chagrongna nangtokengoba chingni field officer-rang neng·takpilgija kamrangko ka·enga aro a·doko JJM-ni kamrangko name chu·sokatna jotton ka·enga,” ine PHE official parakataha.