SHILLONG: Meghalaya a·dokni Reservation Policy-ko gital dake nipilataiani bidingo a·doko songdongenggipa manderang aro dingtang dingtang dolrang, an·tangtangni chanchiani aro nangnikanirangko sorkarini songe on·gipa expert committee-na u·iatahaoba a·dokni BJP dolde da·o dipet maming ku·rang on·a dongskakujaenga.
Iani bidingo BJP-ni state vice president Bernard N Marak-o sing·sandiaton, Reservation Policy-ni bidingo dingtang dingtang membor-rang, an·tangtangni gita expert committee-na ku·pattianirangko on·ahaoba party-ni gitade da·o dipet ku·cholsan ong·e ku·rang on·a dongkujaenga ine talataniko on·angaha.
“Reservation policy-ko nipiltaiani bidingo party-ni gita apsan chanchirimenba, expert committee-na ku·pattianirangko on·ama on·jawa da·o dipet ma·sikujaenga,” ine Marak aganaha.
Marak-ni parakatani gitade, AL Hek-ni expert committee-na ku·pattianiko on·a gitan a·dokni BJP-ba Khasi-Jaintiarangna 40 percent aro Garorangna 40 percent chamanikon namnikpaani cholrang donga. Reservation Policy-o general category-na 15 percent-ko chamchina gita Hek didiangahachim ine nikna man·a.
Khasi-Jaintiarangna chamgimin 40 percent-oni 20 percent-ko Below Poverty Line (BPL) ba cholgri ong·batsranggipa apsan jatni manderangna chamenba, 20 percent-ko gipin Khasi-Jaintirangna chamchina gitaba Hek, Expert Committee-na ku·pattianiko on·atahachim. Apsan daken, Garorangna chamgimin 40 percent-oni 20 percent-ko BPL nokdangrangna chamenba bangki 20 percent-ko obosta namkalgipa Garorangna chamchina a·dokni Cabinet Minister aro BJP-ni dilgipa, Expert Committee-ko didiataha.
Meghalaya a·dokni gipin Scheduled Tribe (ST) aro Scheduled Caste (SC)-rangna 5 percent-ko chamskachina gitaba Hek didiatahachim.
Hek-ni ku·pattianirangna an·tangni chakpaaniko parakatengon, reservation policy-ko nipiltaianio badiaba jatna mikkang niteaniko mesokjachina gita Marak, dingtang dingtang political dolrangko didiataha.
 |
ReplyForward
|