TURA: 2024-25 bilsini B.Ed degree program-na admission on·ani niamrangko talate on·china didie, Tura-ni social activist saksa Cherian Momin, Tura-ni Rongkhon-o donggipa College of Teachers Education (CTE)-ni principal-na sedoataha.
Re·anggipa June-ni 19 tariko entrance exam aro interview-ko ong·atanio pangchake Khasi-Jaintia Hills-oni sak 33 aro Garo Hills-oni sak 5-kosan ia bilsini B.Ed program-na admission on·aiaha ine koborko man·soani ja·man, admission on·ani niamrangko talatchina Momin dabiangaha.
“Iandake admission-ko on·aniara state reservation policy-o nangchakeanirang dongama ma badiaba bil gnanggiparangoni dingtangmancha ge·etanirang dongama talataniko on·china anga nangnikenga. 2024-25 bilsinade chatro chatrirang, Meghalaya aro Nagaland a·dokrangni central university-o bak ong·enggipa college-rango admission ra·na gita Common University Entrance Test (CUET)-ko sena nangjawa ine ma·mong sorkarionin u·iatanikoba on·manahachim,” ine Momin, CTE-ni principal-na sedoatgipa chittio parakataha.
B.Ed course-na Garo, Khasi-Jaintia, SC, OBC aro general category-na chamgimin seat-rangni bidingo, Garo aro Khasi-Jaintiarangna chamgipa seat-rangni bidingo aro SC, OBC baksana general category-na chamgipa seat-rangni giminba talataniko on·china Momin, CTE-ni principal-ko didiataha.