SHILLONG: Adita salrangna skang ong·atanggipa Lok Sabha election-na campaign ka·engmiting somoio dolgipinni kosako ‘mitchigrikani’ kattarangko aganahani gimin a·dokni Education Minister Rakkam A Sangma-ni kosako FIR ka·china a·dokni Trinamool Congress (TMC)-ba a·dok sorkario dabiangaha.
Education Minister-ni kosako matnanganirangko daktokengon maming ja·kurangko de·jaengani giminba TMC, NPP-chi dilenggipa MDA sorkario sing·doangaha.
“Ian sorkarini kamrangko ka·jaenga gitasa ong·enga. Legislative Assembly-ni membor ong·e iandakgipa ‘mitchigrikani’ kattarangko agananiara namen kenna nangani ong·a,” ine a·dokni gitcham chief minister aro TMC parliamentary party-ni dilgipa Mukul M Sangma aganaha.
A·dokni minister ong·e Rakkam-ni agangipa kattarangara a·doko songdongenggipa jatrangni gisepo ding·chaogrikataniko ra·bana man·gipa ong·genchimoba maini gimin sorkari iani bidingo ku·rang on·jaenga ineba Sangma sing·doangaha.
“Sorkari mai ja·kurangko de·enga, iako na·simang chief minister-o sing·na nanga. Uni iandake aganprakaniko deputy commissioner-an nienba FIR ka·na nangachim,” ine ua aganaha.
A·doko tom·tomaniko rakkiangna gita nangchongmotgipa niamrangko ra·gatchinaba TMC-ni dilgipa, sorkariko aganaha.
Dingtang dingtang dilgiparangni skatang ku·watani a·sel Manipur-o dingtang dingtang jatrangni gisepo dinggrikani ong·kataha ine toe janapatengon, “Minister-ni agangipa kattarangko name nigenchimode uan a·doko so·sojengjeng ong·atani cholrang dongachim,” ine Sangma aganaha.
Meghalaya a·doko songdongenggipa Khasi aro Garorangni gisepo ding·chaogrikaniko ra·bana jotton ka·aha ine matnangenba, a·dokni Education Minister Rakkam A Sangma-ni kosako Voice of the People’s Party (VPP), Mongolbar salo FIR ka·doangahachim.
Adita salrangna skang, Lok Sabha election-na campaign ka·engmiting somoi, Meghalaya a·doko VPP bilona re·bagenchimode A·chikrangko a·rikgal jotton ka·gen ine Education Minister-ni agangipa video-ko social media-oniko niksoani ja·man Education Minister-ni kosako VPP-ni finance secretary Danny Langstieh, East Khasi Hills a·jani Superintendent of Police (SP) Sylvester Nongtnger-na FIR ka·doangaha.
