TURA: Meghalaya a·doko Bharatiya Janata Party (BJP)-ni gitaba State Reservation Policy (SRP)-ni bidingo chanchirime, expert committee-na ku·pattianirangko on·na man·na gita dingtangmancha consultative committee-ko songe donangaha ine BJP-ni state president Rikman G Momin parakataha.
Momin-ni parakatani gitade, ia Consultative Committee-ko Tura-ni MDC aro BJP-ni state vice president Bernard N Marak, convenor ong·e dilanggen aro unbaksana BJP-ni state chief spokesperson Mariahom Kharkrang-ba co-convenor ong·gen.
Iana agreba, BJP-ni MDC aro state vice president Lakhon Biam, BJP-ni state secretary Dr Bernadette Lyngdoh aro BJP-ni district president aro GHADC-ni gitcham CEM Boston Marak-ba ia consultative committee-ni membor ong·e dongpagen ine BJP-ni state president parakataha.
Meghalaya a·dokni Reservation Policy-ko gital dake nipilataiani bidingo a·doko songdongenggipa manderang aro dingtang dingtang dolrang, an·tangtangni chanchiani aro nangnikanirangko sorkarini songe on·gipa expert committee-na u·iatahaoba da·o dipet a·dokni BJP dolde expert committee-na maming ku·pattianirangko on·skakujaengachim.
BJP-ni state vice president aro BJP consultative committee-ni convenor Bernard Marak-ni parakatani gitade, AL Hek-ni expert committee-na ku·pattianiko on·a gitan a·dokni BJP-ba Khasi-Jaintiarangna 40 percent aro Garorangna 40 percent chamanikon namnikpaani cholrang donga. Reservation Policy-o general category-na 15 percent-ko chamchina gita Hek didiangahachim ine nikna man·a.
Khasi-Jaintiarangna chamgimin 40 percent-oni 20 percent-ko Below Poverty Line (BPL) ba cholgri ong·batsranggipa apsan jatni manderangna chamenba, 20 percent-ko gipin Khasi-Jaintirangna chamchina gitaba Hek, Expert Committee-na ku·pattianiko on·atahachim. Apsan daken, Garorangna chamgimin 40 percent-oni 20 percent-ko BPL nokdangrangna chamenba bangki 20 percent-ko obosta namkalgipa Garorangna chamchina a·dokni Cabinet Minister aro BJP-ni dilgipa, Expert Committee-ko didiatahachim.
