SHILLONG: Meghalaya a·doko drugs ba pekatgipa sam jakkalani aro badingsrukaniko bon·atna gita sorkari rakbee kamrangko ka·engon, songtangtango ba gittimtangtango iandakgipa kamrangko nirok sandianio Village Defence Party (VDP)-rangko kam ka·atna gita a·dokni Social Welfare Department, jatko dilenggiparangna tangka paisani gita dakchakanirangko on·gen.
Songko nokko dilenggipa manderang baksa nangrime iandake pekatgipa sam jakkalani aro badingsrukaniko champengna miksonganio a·dok sorkari, songo noko jatko dilenggiparangna tangka paisarangko dakchake on·na tik ka·angaha.
A·dokni Social Welfare Minister Paul Lyngdoh-ni parakatani gitade, a·dokni dingtang dingtang biaprango, mongsongbate East Khasi Hills a·jao drugs jakkalani aro badingsrukaniko champengna kam ka·anio, VDP-rangko bilakbatatna gita Social Welfare department, dingtang dingtang Dorbar Shnong ba jatko dilenggiparangni agan-ku·pattianirangkoba ra·engachim.
East Khasi Hills a·jani Shillong songjinmao dol 11 VDP-rang, kamrangko ka·enga aro ia VDP-rang baksa apsan kamrangko ka·rimna gita sorkari, ia VDP-rangko bilakbatatna gita cholrangko sandienga ine Lyngdoh parakataha.
“Ia jani bon·angachibarade chinga seachi ku·pattirangko ra·na man·gnok aro East Khasi Hills a·jaosan ong·ja, Meghalaya a·dok gimikon VDP-rangko tangatpilna gita kamrangko a·bachengna man·gnok,” ine ua aganaha.
A·doko donggipa VDP-ni volunteer-rangna tangka paisarangko on·na man·na gita a·dokni Social Welfare department, India sorkarini tangka paisani gita dakchakanirangko ra·na cholrangko nienga ineba Social Welfare Minister parakataha.
