TURA: South Garo Hills a·jao National Highway-62 (217)-ko tariani aro Baghmara Civil Hospital-ko taridapani kamrang matchotchipkujaenga ine GSU, FKJGP, ADE, AHAM, AYWO, NGCO, APA aro dingtang dingtang dolrang matnangatenba, ia kamrangko ta·rakatchina dabie antisa somoiko sorkarina on·angaha.
NGO-rangni parakatani gitade, NH-62 (217) ramako tarianirang ka·sinengani a·sel aro Baghmara Civil Hospital-koba taridapanirang matchotchipkujaengani a·sel manderang neng·nikanirangko chagrongna nangtokengahachim.
“Ia sal somoirango NH-217 ramako nigenchimode ia ramako tarianirang matchotkujaengani gimin ramarang obosta namsrangjae, ramako re·ruraenggipa manderang neng·nikanirangko chagrongna nangtokenga. Ia ramana an·tangtangni bagan barirangko on·gipa manderangba da·onan compensation-ko man·tokkujaenga. Uni gimin manderangni neng·nikanirangko namatna gita ia kamrangko ta·rakatchina chinga dabienga,” ine NGO-rang parakataha.
Baghmara Civil Hospital-ko taridapa matchotgija da·o kamrangko dontongataha ine janapatskaengon, ia hospital-ara South Garo Hills a·jani manderangna namen nangchongmotgipa sanchakram ong·e, kamrangko matchotgija donaniara manderangna neng·nikaniko on·enga ine South Garo Hills a·jani NGO-rang parakataha.
Ia kamrangko antisani gisepo matchotatjagenchimode a·jao songdongenggipa manderangni namgnina uamang jingjengatanirangko dakna draatako man·gen ineba NGO-rang, mikrakataniko on·angaha.
