SHILLONG: Meghalaya a·doko donggipa skulrangko namdapatna man·na gita political dolrangni gimin chanchigija an·tangtangan skulrangko deragatchina aro nirok sandichina gita a·dok gimikni sak 60 MLA-rangkon a·dokni Education Minister Rakkam A Sangma didiataha.
“Skulrangko jako ra·enba an·tangtangni tangka paisarangchi skul nokrangko rike on·china chinga a·dokni pilak sak 60 MLA-rangkon mol·molna ska,” ine Sangma aganaha.
An·tangni constituency-o skul nokrangko rikna gita tangka paisarangko chame on·china gita Education Minister, Tura-ni MDC Bernard Marak-koba didiataha.
Education Minister-ni Siju-Rongara constituency-o skul nokrangni obosta namsrangjaenga ine dingtang dingtang dilgiparang matnangtokahani gimin ua ia kattarangko aganskaaha.
A·dokni dingtang dingtang biaprango skul nokrang obosta namjaenga ine matnanganirangna aganchakaniko on·angengon, batanggimin bilsi bongani gisepo ia sorkari, skul nokrangko bang·en taridape on·na aro rikna jotton ka·aha ine Sangma aganaha.
“A·dokni bang·bea skul nokrangkon sorkari taridape on·aha aro mitam biaprangode gital skul nokrangkoba rike on·aha. Chinga mikkangchiba lekka porako tang·doatna gita skul nokrangko taridape on·angkugen aro nanggiparangode gital nokrangkoba rike on·angkugen,” ine ua aganaha.
Siju-Rongara constituency-ni mitam skul nokrangkosan nienba uko matnangahani gimin Tura-ni MDC-ko jegalatengon, ua an·tangba an·tangni constituency-ni ning·o namdapataniko ra·bana gita dakchakanirangko on·na nanga aro mitam skulrangko jaktango ra·na nanga ine Education Minister parakataha.
“Anga angni constituency-ni ning·o skul nokrangko rikna gita MLA scheme-ko jakkalaha aro mikkangchiba an·tangni bil ama gitan skul nokrangko rike on·na jotton ka·angkugen,” ine Sangma aganaha.
A·doko, mongsongbate Garo Hills-o sorkari skul nokrang obosta namsrangjaengahani gimin bang·a manderang suk ong·gijaniko paraktokahachim.