SHILLONG: Meghalaya a·doko dingtang dingtang kamrang, mongsongbate Arts & Culture, Heritage Studies, Indigenous Communities, Land, Language & Lineage, aro Evaluation Studies-ni bidingo research dakenggipa manderangko dakchakna gita sorkari Chief Minister’s Research Grant (CMRG)-ko a·bachengate on·angaha aro ia grant-ko Bristibar salo, a·dokni Chief Minister Conrad K Sangma, oprake on·angaha.
Ia CMRG-ko a·bachengate on·anganio a·dokni Chief Minister, jinmana aganprakangengon, dingtang dingtang kamrangni bidingo research ka·na nangani aro see rakkina nanganirangko agan-talate on·angenba, manderangni research ka·aniko nambatatna gita ia grant-ko a·bachengataha ine parakataha.
Ia grant-na dorgastorangko galchina research dakgipa manderangko aro chatro chatrirangko didiangengon, nanggenchim ong·ode sorkari, ia grant-ni ning·o on·enggipa tangka paisarangko ja·mano bariatgen ine Chief Minister parakataha.
Chief Minister-ni parakatani gitade, dingtang dingtang kamrangni bidingo research ka·aniko namdapatna miksonge sorkari, ia CMRG-ko a·bachengataha aro ia scheme-ni ning·o seokako man·gipa project mingantian, ja 10-na gong lak 3 tangkarangko man·gen.
Ia CMRG-na dorgastorangko re·baenggipa July 20 tarik walni 11:59 bajiona ra·chakgen aro seoka man·gipa scholar-rangko August jani gnigipa antio u·iatenba, ia grant-ni skanggipa instalment-ko August 15 tariko on·anggen.
Ia grant-na gisiko nanggipa manderang dorgastorangko Meghalaya sorkarini website, Arts & Culture department-ni website ba Department-ni social media-rang gita online-o galatna man·gen.
