TURA: Meghalaya a·dokko man·aoni bilsi 50 batpilengahaoba da·alonan A·chikrang pilakni gitan ja·manchakkuenga aro Khasi-Jaintiarang baksade apsan gadango ong·pakujaengani gimin Reservation Policy-o Garorangna 40 percent-kon donna nangkuenga ine Nokma Council, State Reservation Policy (SRP)-ni bidingo Expert Committee-na sedoatgipa chittio parakataha.
“Apsan bak rengsiko man·china gitasa a·dokko man·e on·dilgipa pagitchamrang, Reservation Policy-o Khasi-Jaintia-na 40%, Garorangna 40% aro gipin jatrangna 20%-ko chame on·ahachim indiba da·o a·dokko man·aoni bilsi 50 batpilengahaoba A·chikrang, an·tangtangni bak rengsikon chu·gimik man·kujaenga. Ia niamko kakket aro bebeo ja·rikgenchimode a·doko songdongenggipa pilak jatrangnan namgni ong·gen,” ine Nokma Council, Expert Committee-na sedoatgipa chittio janapataha.
Meghalaya a·dokko man·aoni bilsi 50 batpilengahaoba A·chikrang, Khasi aro Jaintia-rangna bate ja·manchakkuenga ine janapatengon, 1972 bilsio sualgimin gita Garorangna 40 percent aro Khasi-Jaintiarangna 40 percent reservation-ko taridapgenchimode A·chikrangoni bang·en kamgri ong·na nangtokgnok aro ian jatni chadamberangna gimaani ong·gnok ine Nokma Council parakataha.
Indake ong·engon, badiaba kamrangna interview ra·anio chu·sokgipa candidate-rangko parake mesokchina aro reservation quota-ni gita waiting list-oniko ra·genchimoba pangnan parake dakchina Nokma Council didiataha.
“Khasi-Jaintiarangnade kamrangko ka·e cha·ani cholrang bang·en donga maina Shillong-ode Accountant General Office, General Post Office, Telephone Office, Geological Survey of India aro uandakgipa dingtang dingtang office-rang donga indiba Garorangde iandakgipa central government office-rango kamrangko ka·e cha·pana chol ong·ja,” ine Nokma Council parakatenba, 1972 bilsini State Reservation Policy-ko taridapgija apsan niamkon kakket aro bebeo ja·rikangkuchina Expert Committee-ko didiataha.
