TURA: Bristibar pringo, 100 Battalion (Bn) BSF-ni official saksa, West Garo Hills a·jani Dalu samba jolo, mongma dokako man·enba janggitangko gimaataha.
Koborko on·ani gitade, Bristibar pringo 100 Bn BSF-ni Sub Inspector (SI) Rajbir Singh, pangna dakrongbewal gita India aro Bangladesh a·songni simao nirok sandianirangko dakengachim indiba rang·gitik dolsa mongmarang buringoni ong·katbaenba uko chadrapeaha.
Sianggipa BSF official, Haryana a·dokoni ong·achim, jean Garo Hills-ona re·bae kamko ka·engachim.
Uni iandakgipa a·selko chagronge sianganina BSF official-rang kalimpaaniko parakattokaha.
Re·anggipa bilsioba South Garo Hills a·jani Nilwagre songo, BSF dolni head constable Vijay Kumar, apsan daken mongma doka man·enba siangahachim.
Ua somoio BSF-ni sipai sakgni, motorcycle-o Domdoma border outpost (BOP)-oni Nilwagre BOP-ona motorcycle-o re·angengachim indiba Rasnagre aro Nilwagre songni gisepo donggipa ramaona sokon, uamangko dolsa mongmarang chadrapsoahachim. Mongmani chadrapako man·e sipai sakgnioni saksade bilongbee mata bu·anirangko man·aha aro ja·mano uko songni manderang, Sibbari PHC-ona ra·angahachim indiba Sibbari health centre-ona sokangon uko siaha ine doctor-rang parakahachim.
Batanggimin salrangonin South Garo Hills a·jani border ramarango mongmarang re·rame, rama gita re·pakangenggipa manderangko chadraprongengachim ine nikna man·a.
Iandake mongmarangni chadrapanichi, a·song damgnini simarangko nirokenggipa BSF sipairangnaba da·o kenna nangani ong·beenga.
