TURA: West Garo Hills a·jao Demdema C&RD Block-ni dingtang dingtang village employment council (VEC)-rang, MGNREGA-ni bill-rangko man·chipkujaenga ine matnangenba, iani bidingo inquiry-ko dakchina VEC-ni gital aro gitcham dilgiparang dabiangtokaha.
Iani bidingo RTI ka·anio pangchake a·dokni Chief Minister Conrad K Sangma-na badi ka·doatengon, ia VEC-rang bangki dongkuenggipa bill-rangko man·chipkujaenga ine matnangatenba, maini a·sel bill-rangko da·onan man·tokkujaenga, uko ma·sina gita inquiry-ko dakchina VEC-ni dilgiparang dabiangtokaha.
“Demdema C&RD Block-ni ning·o donggipa Borshibanda, West Bholarbitha, Charbatapara, Haribanga Part-I aro II, Purna Nagar, Pushkurnipara, Islampur, Bangalkhata aro gipin VEC-rangba, krorni kror ong·gipa bosturangni bill-rangko da·onan man·tokkujaenga,” ine ia VEC-rangni dilgiparang parakataha.
Chief Minister-na badi ka·doanggipa chittio VEC-rangni parakatani gitade, ia VEC-rangna work order-ko 2020-21 aro 2021-22 bilsirangon on·ahachim aro kamrangkoba matchote completion report-rang baksa bill-rangkoba office-na submit ka·manahachim.
Indake ong·genchimoba ia bosturangni bill-rangko da·onan VEC-rangna gamchipkujaenga ine VEC-ni dilgiparang matnangataha.
“Badiaba political dolni dilgiparang, Charbatapara, Bangalkhata, West Bholarbitha aro gipin VEC secretary-rangoniko blank cheque-rangko ra·angenba, bill-rangko oke chingna gamgen ine chingna ku·rachakaniko on·ahachim. Indiba da·alonan bill-rangko okama okkuja, ukoba chingna u·iata dongkuja,” ine VEC dilgiparang parakataha.
Iani bidingo changni chang BDO-na u·iatahaoba da·onan bill-rangko man·kujaenga ine janapatengon, iani bidingo kakketko ma·sina man·na gita ta·raken inquiry-ko dakna ge·etaniko on·atchina gita ia VEC-rang, a·dokni Chief Minister-ko didiataha.
