SHILLONG: Bristibar salo, National People’s Party (NPP)-ni dilgiparang tom·aniko ong·atangenba, Gambegre Assembly constituency-ni by-election-o susana gita sakbrini bimingko minge donangchengaha.
Koborko on·ani gitade, Gambegre by-election-na NPP-ni candidate-ko mikkang antio tik ka·anggen.
“Da·al salni bako chinga tom·aniko ong·ataha indiba lekkani kamrang dongkuengani gimin candidate-ko seokna gita chinga antisa somoiko ra·kuenga. Mikkang antini gisepo chinga tom·e chanchirimtaienba chingni candidate-ko parakatnaba gnang,” ine Bristibar salo, NPP-ni working president aro a·dokni Cabinet Minister Marcuise N Marak, kobor ra·timgiparangna parakataha.
Gambegre by-election-o susana gita candidate-rangni bimingko tik ka·manahama ine sing·anina aganchakaniko on·angengon, “Da·o dipet chinga bimingrangko tik ka·srangade ong·kuja indiba sakbrini bimingko chinga minga donmanaha. Gipinrangde party-ni high command jeko tik ka·a, ukon ra·chakaigen ine aganmanaha,” ine Marak aganaha.
Marak-ni aganani gitade, block level-oni district level-ona aro district level-oni state election committee-ona watatahani gimin candidate-ko seokanio lekkani kamrang bang·en dongkuenga.
Iana skangde, Gambegre by-election-o susana gita komibeoba sak 10 manderang NPP-ni tikitna nidinge dongtokengachim aro uamangoni mongsonggiparangara, Chief Minister Conrad K Sangma-ni jikgipa Mehtab Chandee, Tura-ni gitcham MP Agatha K Sangma, Chief Minister-ni adatang James K Sangma, Chief Minister-ni bochitang Jasmine Bonny A Sangma, GHADC-ni MDC Linekar K Sangma, Rakesh Sangma, Ambrose Marak aro Nehru Sangma ong·achim.