SHILLONG: Meghalaya a·doko donggipa North Eastern Indira Gandhi Regional Institute of Health & Medical Sciences (NEIGRIHMS)-na All India Institute of Medical Sciences (AIIMS) gita apsan gadangko on·china a·dok sorkari, ma·mongni Union Health Ministry-ko didigen.
Health department-ni dingtang dingtang kamrangko nipilna gita Bristibar salo tom·aniko ong·atangani ja·man iako a·dokni Health Minister Ampareen Lyngdoh, kobor ra·timgiparangna parakataha.
NEIGRIHMS-ni nangchongmotgipa dingtang dingtang kamrangni gimin agangrikna gita re·baenggipa antio Health department-ni official-rang, Union Health Minister JP Nadda-ko grongegen ineba Lyngdoh parakataha.
Health Minister-ni aganani gitade, NEIGRIHMS-o donggipa Cancer research centre-ko chalaianio bangki dongkuenggipa kamrangni giminba uamang, ma·mongni Union Health Minister baksa agangrikgen.
Meghalaya a·dokni doctor-rangna NEIGRIHMS-o postgraduate course-rangko dakna man·na gita seat-rangko chu·onge donchinaba sorkari nangnikenga ine Lyngdoh aganaha.
“NEIGRIHMS-ara Meghalaya a·dokon ong·ani gimin an·chingni doctor-rang PG course-rangko poraidapangkuna dingtangmancha seat-rangko donani bidingo chinga ma·mong sorkari baksa agangrikgen,” ine ua aganaha.
Medical professional-rang bang·batan Meghalaya a·dokoni gipin a·dokrangona re·angtokengani giminba a·dok sorkari, Union Health Minister baksa agangrikna nangenga ineba Lyngdoh parakataha.