TURA: Meghalaya a·dokko man·chengani somoio, a·dokni gisik seng·gipa, mikkangchina chanchina changgipa aro a·dokko man·dile on·anggipa manderangsa State Reservation Policy-ko tarie on·ahachim ine Tura-ni Cheran Mahari Association parakatenba, ia State Reservation Policy-ko gital dake taridapna expert committee-ko songaniko raken jegalataha.
1972 bilsini Meghalaya State Reservation Policy-o Khasi-Jaintiarangna 40 percent, Garorangna 40 percent, General Category jekai Bengali, Marwari, Bihari, Muslim aro ugita dakgipa jatrangna 15 percent aro unbaksana a·doko ja·manchakgipa Scheduled Tribe/Scheduled Caste-rangna 5 percent-ko donahachim ine janapatengon, “Ia reservation-ko name chanchibewale tarina gita Meghalaya a·dokko chu·gimik man·na skang Autonomous State-ko on·chengmitingo North Garo Hills a·jani Mendipathar-o donggipa ‘Mingchengram Club’-o skanggipa Member of Legislative Assembly-ni tom·e chanchienba State Reservation Policy-ko tik ka·chengaha aro iako Memo No. PER.222/71/138 Dt. 12th January, 1972-o pangchake tik ka·aha. Ian mande jelbra jelsuaniko hisape dona ong·ja indiba jatni lekka pora badita gadang aro janggi tangani gadangko niesa reservation-ko donaha,” ine Cheran Mahari Association parakataha.
Meghalaya a·dokko 1972 bilsini January 21 tarik waljatchio Union Government of India, Assam sorkarioniko ma·ekate full fledged state dake parakataha ine janapatengon, ua salara a·doko songdongenggipa pilak manderangnan namen katchabeani sal ong·aha aro Reservation Policy-koba apsan gisiksan ku·cholsan ong·e, darang jatkoba galongija aro mikkang nitee tarigija Meghalaya a·dokko man·dilchenggipa rikdilchenggipa gimikan jatsa jatgipinna oniako dakgija chasongni chasongna ku·mong nangrime songdong a·chana ine miksongesa ku·chakgrike State Reservation Policy-ko tariaha ine Cheran Mahari Association parakataha.
Ua somoionin Khasi-Jaintiarangna 40 percent, Garorangna 40 percent, General category-na 15 percent aro gipin ST aro OBC-rangna 5 percent-ko ja·rikbaengaha ine janapatskaengon, “Ia ku·mong nangrimaniko rakkiangkuna, tom·tome jatsa jatgipin baksa songdong a·chaangkuna aro dakchakgrikna gita ia State Reservation Policy-ko maming dakeba dingtangatna nangja aro apsan niamkon ja·rikangkuna nanga,” ine Tura-ni Cheran Mahari Association parakataha.