SHILLONG: Shillong airport-oni attamo aro waloba sildorengrang bilrurana man·na gita salo changgni dake bilrurana on·china a·dok sorkari, ma·mongni Civil Aviation Ministry-ko didiangaha.
Adita salrangna skang, ma·mongni Civil Aviation Minister-ko gronge agangrikani bidingo kobor ra·timgiparangna talataniko on·angengon, Shillong airport-oni salo changgni dake sildoreng bilrurana bi·aniko Civil Aviation Ministry ra·chakgenchimode, mitam sildorengrang seng·gnang bilange, mitamrangde attamo aro waltingoba bilone bilangpilna man·aignokchim ine Chief Minister parakataha.
Shillong airport-o walni somoioba sildoreng bilonna gita cholrang dongaha ine talataniko on·angengon, iako dakna chol on·genchimode sildorengrangko bang·bata ia airport-ona ra·bana man·gen aro sildoreng bilruraani somoirangkoba nambate tarina man·gen ine Sangma aganaha.
Chief Minister-ni aganani gitade, ia mol·molaniko niatna gita Union Civil Aviation Minister ku·rachakaniko on·ataha.
Shillong aro Tura-ni heliport-rangko namdapatani bidingo Union Minister baksa agangrikaniko janapatskaengon, a·dokni dingtang dingtang biaprango heliport-rangna a·dok sorkari biaprangko on·skana nanggen ine Chief Minister parakataha.
Garo Hills-o donggipa Baljek Airport-ni runway-ko bakrodapatani aro Shillong-Tura songjinmani gisepo sildoreng bilruraatani giminba ua Union Civil Aviation Minister baksa agangrikaha ineba Chief Minister parakataha.
Da·o dipet Shillong airport-ko Robibar salrangode chipe donaiengani gimin sildorengrang bilangna aro bilonna gita man·kujaengachim ine nikna man·a.
Salario bilenggipa sildorengrangba salpaksaon bilangpilrongengani gimin attamo ba walni somoirango songrena nangenggipa manderangde Shillong-oni sildorengrango bilna chol ong·kujaengachim.
