WILLIAMNAGAR: East Garo Hills a·jao dambe me·tra sakgniko kragija dake dokgipani bidingo maming ja·kurangko de·jaha ine matnangenba, me·chik police officer sakgnini kosako East Garo Hills a·jani dolbonga NGO-rang, East Garo Hills a·jani Superintendent of Police (SP)-na badi ka·doangaha.
Koborko on·ani gitade, ia me·chik sakgniko, re·anggipa antio, me·asa sakbri kragija dake doka satachim.
East Garo Hills a·jani SP-na badi ka·doanggipa lekkao NGO-rangni parakatani gitade, Williamnagar women’s police station-ni officer-in-charge Krusitha G Momin aro Rongjeng women’s police station-ni Sub-Inspector Jansitha S Marak, ia a·selni bidingo dos dakgipa manderangni kosako maming ja·kurangko de·jaha aro batesa ia case-ko ra·pilchina gita me·chik bi·sa sakgnini nokdangko ka·mikkenatpilahachim.
Ia me·chik bi·sa sakgniko porikka ra·e nichenggija ‘porikka ra·e nimanaha’ ine Williamnagar women’s PS-ni officer-in-charge Krusitha G Momin, me·chik sakgnini nokdangna u·iataha aro Rongjeng women’s PS-ni officer-in-charge Jansitha S Marak, ia case-ko ra·pilchina me·chik bi·sa sakgnini nokdangko agane, ia me·chik bi·sa sakgniko police station-o donchae roaha ine NGO-rang matnangataha.
SP-na badi ka·doangani gitade, ia me·chik police officer sakgni, me·chik bi·sa sakgnikoba dos donga ine aganenba, me·chikrangni namgnina dos dakgipa manderang baksa songgigrike ia case-ko bon·atchina gita me·chik sakgnini nokdangrangko aganaha.
Indake ong·engon, ia police officer-rang mikkangchi iandakgipa kamrangko ka·taijana gita ia me·chik police officer sakgnini kosako nanga gita ja·kurangko de·china NGO-rang, East Garo Hills a·jani SP-ko didiataha.