SHILLONG: Adita salrangna skang ong·atanggipa Lok Sabha election-o BJP-ni chakpaaniko on·gipa NPP-ni amako man·ahani gimin BJP-ni Meghalaya in-charge M Chuba Ao-ni kosako matnanganirangko BJP-ni dilgipa aro a·dokni Cabinet Minister AL Hek jegalatskaaha.
Ao-ni kosako matnanganirangko jegalatengon, pilak political dolrangon iandakgipa obostarangde ong·aia aro iako uamang party-ni gita chanchirimanggen ine Hek parakataha.
Iandake matnanganirangko dal·e ra·na nangja ine janapatengon, iandakgipa obostarangkode party-ni ning·on agan-chanchirimna man·aia aro da·o dipet party-ni gita uamang maming badi ka·anirangko man·soa dongkuja ine BJP Minister aganaha.
Garo Hills-o BJP-ni mitam dilgiparang M Chuba Ao baksana a·doko BJP-ko dilenggipa manderangni kamrangna suk ong·gijaniko paraktokahachim aro Lok Sabha election-o Meghalaya a·dokni damgni Lok Sabha constituency-on BJP-ko susana on·jahani gimin Ao-ko matnangtokahachim.
Indake ong·engon, Lok Sabha election-de Assembly election-rang baksa apsan ong·ja ine da·o ong·atna sienggipa Gambegre Assembly constituency-ni by-election-o Congress dol chegipa ong·na man·jawa ine Hek a·kangataha.
Tura Lok Sabha constituency-o Congress dolni candidate Saleng A Sangma, bang·bea vote-rangchi an·tang baksa susaskagipa candidate-rangko amchepahani gimin Hek, ia kattarangko aganaha.
Gambegre by-election-de BJP-ba susagen ine talataniko on·angengon, Gambegre by-election-o BJP-ni tikitchi susana sikenggipa manderang bang·en donga ine BJP Minister parakataha.
Meghalaya a·dokni District council election-rango BJP susana nanga ineba Hek aganaha.
