TURA: Robibar salo, me·chik saksani manggisiko songni manderang, South Garo Hills a·jani Jadigittim-oniko nikaha.
Iani bidingo songni manderang, Robibar attamni 3:30 bajimango, Nongalbibra police station-ona kobor on·ataha aro bakan Nongalbibra police station aro Jadi outpost-ni police-rang ua biapona re·ange, manggisiko nieaha.
Police-rangni u·iatani gitade, ia biapona re·ange manggisini bidingo am·sandianirangko dakon, sianggipa me·chikara Assam Kamrup a·jani Boko-o donggipa saksa Rajesh Bahadur minggipa mandeni bilsi 36 ong·gipa demechik Rupa Rabha ong·achim ine ma·sina man·aha.
Ia manggisiko name nion, uni gitoko ragekani chinkoba nikaha aro ia me·chikko saobasa drae til·ekani ja·man so·ote galahakon ine police-rang chanchichipenga.
Ia me·chikni manggisiko, uni dongchakenggipa nokoni metre 20-mang chel·aoniko man·aha.
Ia me·chikni bidingo police-rang am·sandion, ua saksansa ia noko dongengachim ine ma·sina man·aha.
Ia a·selni bidingo police-rang, IPC-ni section 302 aro 376-ni ning·o mokordoma ka·aha ineba police-rang u·iataha.