SHILLONG: Garo Hills-ni Sonja Wildlife Rescue Centre-o donenggipa hurorangko Ri Bhoi a·jani Umtrew-o gital kulienggipa State Zoo aro gipin biaprangonaba apjitangna sorkari manchienga ine Garo Hills-ni dingtang dingtang dolrang, sorkarini kosako matnangtokengani gimin da·o dipet Garo Hills-ni hurorangko gipin biaprangona apjitangna gita sorkari tik ka·a dongkuja ine a·dokni Chief Minister Conrad K Sangma talataniko on·ataha.
Garo Hills-ni hurorangko gipin biaprangona apjitanggenchimode ia hurorang, gipin biaprango tangna man·jawa ine Garo Hills-ni dingtang dingtang dolrang, hurorangko Garo Hills-on donaichina sorkariko diditokahachim ine nikna man·a.
Indake ong·engon, Sonja Wildlife Rescue Centre-o donenggipa hurorangko State Zoo-ona aro gipin a·dokrangona apjitangna gita sorkari miksongenga ine matnanganirangko a·dokni Chief Minister jegalatskaenba, da·o dipet Garo Hills-ni hurorangko a·dok sorkari gipin biaprangona apjitangna tik ka·a dongkuja indiba Central Zoo Authority (CZA)-onisa ia biapo donenggipa hurorangko dingtang dingtang a·dokni state zoo-rangona ra·angna bi·anisan ong·aia ine parakataha.
Sonja Wildlife Rescue Centre-o donenggipa hurorangko State Zoo-ona aro gipin a·dokrangona apjitangani bidingo official-rangni songbadrango parakatgipani gimin sing·anina talataniko on·angskaengon, Sonja Wildlife Rescue Centre-ara CZA-ni nikanio matburingrangko donchakna namgipa biap ong·jani gimin aro ia hurorangko ia centre-o ru·utbea bilsirangna donahani gimin da·o ia hurorangko buringona watpilataniara ia hurorangna kenchakna nangani ong·engani giminsa ia hurorangko CZA-ni ra·chakgimin state zoo-rangona apjitatna gita proposal on·anisan ong·aia ine Chief Minister parakataha.
“Ian CJA-ni proposal on·anisan ong·aia indiba hurorangko apjitangna da·o dipet sorkari tik ka·a dongkuja,” ine Sangma parakataha.