WILLIAMNAGAR: East Garo Hills a·jani Nengkhra songo Eklavya Model Residential School-ko rikna pangchakaniko songe on·angani ja·man da·ona kingkingan ia skulko rikgija galchipe donenga ine FKJGP Nengkhra circle matnangataha.
FKJGP Nengkhra circle-ni president Tengkan Momin-ni parakatani gitade, ia songo Eklavya Model Residential School-ko rikna gita songni Nokma aro maharirangan biapko on·ahachim aro 2019 bilsini March 5 tarikon ia skulko rikna gita pangchakanikoba Williamnagar-ni MLA Marcuise N Marak baksana ua somoio East Garo Hills a·jani Deputy Commissioner ong·enggipa Swapnil Tembe songe on·angahachim.
Indake ong·genchimoba, ia skulko da·alona kingkingan rikna kamrangko a·bachengkujaenga ine FKJGP Nengkhra circle-ni president, suk ong·gijaniko parakataha.
“Ia skulko rikna pangchakaniko songe on·angaoni da·o bilsi bonga batangpilengjok indiba da·alonan kamrangko a·bachengkujaenga. Ia Eklavya Model Residential School-ko Nengkhra-o kulianichi ian wilwilao donggipa chatro chatrirangnasan namgni ong·jawa indiba Meghalaya a·dok gimiknan namgni ong·genchim,” ine Momin parakataha.
Ia EMRS-ko bimang pil·ate on·jagenchimode ian Nengkhra jolo donggipa manderangkosan togia ong·jawa indiba Meghalaya a·dok gimikni manderangkon togia gita ong·gen ineba FKJGP Nengkhra circle-ni president parakataha.
Ia skulko rikna gita changsaba biapona re·bae niea dongkuja ine ua a·dokni Education Minister Rakkam A Sangma-koba matnangataha.
“Angni chanchiani gitade, ia Eklavya Model Residential School-ko manderangna rika ong·ja indiba me·mangrangnasa rikahakon, unasa Education Minister-ba changsaba ianona re·bae niea dongkujaenga,” ine Momin matnangataha.