SHILLONG: Re·anggipa July-ni 3 tariko All India Garo Union (AIGU)-ni tom·bimonganiko Shillong songjinmani Bishop Cotton Road-o donggipa Garo Union Secondary School-o ong·atangenba, AIGU-ni dilgiparangko seokangtaiaha.
Ia tom·bimonganio AIGU-ni pilak membor-rangan bak ra·angtokaha aro 2023 bilsini July 29 tariko seoka man·gipa apsan dilgiparangkon da·o 2025 bilsini July jaona kamko ka·angkuchina gita namnike ra·chakangtokaha.
Seoka man·gipa AIGU-ni dilgiparangara, president-na Elbarth Marak, vice president-na Rompi N Sangma, secretary general-na Diplu G Momin, additional secretary general-na Abinash G Momin, Arther A Sangma, social welfare secretary-na Tended G Momin, aro finance & accounts secretary-na Silman K Marak ong·a.
Indake ong·engon, AIGU-ni niam bidikko pe·e union-ni mitam membor-rang, an·tangtangko AIGU-ni dilgiparang ine kam ka·na jotton ka·engani gimin mikkangchi iandake kamko ka·taigenchimode rakgipa ja·kurangko de·anggen ineba ia tom·anio AIGU-ni pilak membor-rangan tik ka·e donangaha.
