TURA: Garo Hills Autonomous District Council (GHADC)-o kam ka·giparangna dormaharangko on·jani a·sel council-o kam ka·gipa manderangoni sak 21 sina gita nangaha ine badi ka·gipani bidingo gital dake sandirokchina Meghalaya Human Rights Commission, GHADC-ni Chief Secretary-na ge·etaniko on·ataha.
GHADC-o kam ka·giparangna 2018 bilsionin dormaharangko tik ong·e on·jahani a·sel kam ka·giparangoni mitam nokdangrangde sagipa manderangko sanna banna gita man·jae sak 21 manderangde sina gita nangaha ine 2020 bilsini August 14 tariko, Non-Gazetted Employees Association (NGEA)-ni gitcham dilgiparang, chong·motan Flaming B Marak, Senora Johny Arengh, Brithen Sangma aro gipin sakbri dilgiparang badi ka·doangahachim.
NGEA-ni badi ka·gipani bidingo District Council Affairs Department-ni Commissioner & Secretary Aldous Mawlong, IAS, inquiry-ko dakenba 2020 bilsini December 15 tariko report-ko on·ahachim indiba uni report-ko NGEA-ni dilgiparang chu·ongnikjahani gimin iani bidingo gital dake sandirokchina MHRC, ge·etaniko on·angtaiaha.
Mawlong-ni inquiry report-o uamangni agananirangkode segatajaha inenba NGEA-ni dilgiparang suk ong·gijaniko parakani ja·man MHRC-ni tom·aniko Tura-o ong·ataha aro uandaken inquiry report-ko NGEA-ni dilgiparang chu·ongnikjahani gimin gital dake inquiry-ko dakpiltaina nanga ine MHRC tik ka·angaha.
MHRC-ni ge·etaniko on·angani gitade, ia gital inquiry-ko Meghalaya sorkarini Commissioner & Secretary-ni gadango ong·gipa officer ka·anggen aro inquiry report-ko sal 60-ni gisepon Commission-na on·na nanggen.
 |
ReplyForward
|
