SHILLONG: BJP-ni Meghalaya in-charge M Chuba Ao-ni kosako Garo Hills-ni mitam dilgiparang suk ong·gijaniko parakataoni baditaba antirangni ja·man Ao-ko Meghalaya in-charge ong·aoniko BJP-ni dilgiparang ra·galataha.
Sukrobar salo BJP-ni president JP Nadda-ni parakatani gitade, BJP-ni national secretary Anil Anthony-ko Meghalaya in-charge-na seokskaaha aro apsan somoion Nagaland a·dokoba nirokanggen.
Meghalaya a·doko BJP-chi chakpaanichi Lok Sabha election-o susagipa NPP amako man·ahani gimin aro Lok Sabha election-o BJP-ko susana on·jahani gimin Garo Hills-o BJP-ni mitam dilgiparang M Chuba Ao-ni kamna kusi ong·gijaniko paraktokahachim ine nikna man·a.
Indake ong·genchimoba, a·dokni Cabinet Minister aro BJP-ni dilgipa AL Hek-de iani bidingo badi ka·anirangko man·soa dongja ine a·kangskaahachim.
Ao-ni kosako matnanganirangko jegalatengon, pilak political dolrangon iandakgipa obostarangde ong·aia aro iako uamang party-ni gita chanchirimanggen ine Hek parakatahachim.
Iandake matnanganirangko dal·e ra·na nangja ine janapatengon, iandakgipa obostarangkode party-ni ning·on agan-chanchirimna man·aia aro da·o dipet party-ni gita uamang maming badi ka·anirangko man·soa dongkuja ine BJP Minister aganahachim.
