SHILLONG: Re·baenggipa bilsi 2028-ode Congress party sorkariko riktaigen aro Chief Minister-ba party-onin ong·gen ine ka·donganiko Tura MP Saleng Sangma aganaha.
Sonibar salo Shillong-o MP Saleng Sangma-ko mande ra·aniko dakangaha. Unomitingo Saleng, “Meghalaya-osan ong·aija, Congress bilsi 2029 general election-o bang·bate chegen’ ine aganaha.
Beben party, cheani aro ga·akanirangko chagrongaha indiba mitam namgipa dilgiparang dingtang dingtang obostarangni a·sel election-o sirikaha. Congress-ko janggilchi donatahachim indiba da·ode chinga mikkangona re·bataiengjok, kakketna chinga pangna dakgrikgen, ine Salenga aganaha.
Uandake Shillong-o maidake Congress election-o sirikaha ine sing·ahaon Saleng indine aganchakaha, “maini gimin sirikaha, aro party maini a·sel ja·manchakaha, iako name dake chanchitaina nanggen.”
Jeba party-ona re·bapilna sika, darangkoba champengja, indiba bon·kamode All India Congress Committee-ni jakosa ong·a ine Meghalaya Pradesh Congress Committee Chief Vincent Pala aganaha.
Ronnie V Lyngdoh aro Saleng Sangma- uamangni gisepo Mukul Sangma aro uni nokdang, party-ona re·bapilani bidingo meligrikjaengani gimin Pala, ia kattarangko aganaha.
Party, darangkoba jegalsoja jeba re·bana sika gimikkon rimchaksoa ine Pala aganaha.
Conrad Sangma-ni cabinet-ni 80 percent Minister-an Congress-onisa ong·a ine janapate, jeba party-ona re·bana sika, ra·bana man·gen, indbia AICC-ni jakosa ong·a ine Pala aganaha.
Iarangni gisepon Pala, gimik political dilgiparangko apsan ong·e a·dokni namgnina kam ka·na nangnikaniko aganaha.
