SHILLONG: Sonibar salo, East Jaintia Hills a·jani Umpleng songo, ma·sina man·gijagipa mande sak-brini manggisirangko man·aha.
Manggisirangko man·-gipa biapara Meghalaya Police-ni Umpeng Anti Dacoity Camp-ni ning·o donggipa biap ong·achim.
East Jaintia Hills a·jani Superintendent of Police (SP) Giri Prasad-ni u·iatani gitade, ia mande sakbrini manggisirangko man·ani ja·man ia a·selni bidingo sandirokna gita Shillong-ni Crime Scene Unit-ko okamataha aro ia manggisirangko name niani ja·man post mortem ka·na gita Jowai Civil Hospital-ona ra·anggen.
Ia manggisirangko Sonibar pringo, ua jolo kam ka·enggipa manderangsa nikchengaha aro ia manggisirangko Umpleng songni galchipgimin biaponikosa nikaha ineba SP parakataha.
Ia manderangko ma·sina gita police-rang am·sandia-nirangko dakenga aro ia manderangara Tribal ong·gijagipa manderangsa ong·achim ineba Prasad parakataha.
