SHILLONG: Meghalaya a·doko niam gri napsrukanirangko sorkari champengna kam ka·jaenga ine matnangenba Sonibar salo, Khasi Students Union (KSU)-ni membor-rang, uamangni president Lambokstar Marngar aro general secretary Donald Thabah-ni dilanichi, Ri Bhoi a·jani Pahammawlein songo donggipa National Highway (NH-6) ramao Inner Line Permit (ILP) check gate-ko songaha.
Gipin biaprangoni niam gri Meghalaya a·dokona re·baenggipa manderangko nirok sandina gita KSU-ni membor-rang, ia biapo ILP check gate-ko kuliaha aro NH-6 rama gita re·ru-raenggipa garirangni lekkarangko niangaha. KSU-ni iandake ILP check gate-ko kuliani ja·man Ri Bhoi a·jani Magistrate aro police-rang sokbaenba, ia biapo ILP check gate-ko kulijachina aro iani bidingo dolgni agangrikna mol·mo-leaha. Ia ILP check gate-ko kuliani bidingo KSU-ni president aro general secretary talate on·ang-engon, Meghalaya a·doko ILP aro Meghalaya Residents Safety & Security Act (MRSSA)-ko a·dok aro ma·mong sor-karirang ra·gatna gisik nangjaengani gimin jegalaniko mesokna gitasa uamang kuliaha ine parakataha.
Mikkangchiba a·dok aro ma·mong sorkarirang ILP aro MRSSA-ko ra·gate on·na gisik nangangku-jagenchimode apsan daken an·tangtang niamko jako ra·e iandakgipa check gate-rangko kuliangkugen ineba KSU-ni dilgiparang parakataha.
