SHILLONG: Congress-o napna sikenggipa manderangko darangkoba man·jawa ine aganja indiba napna sikgiparangni gimin All India Congress Committee, chanchigen ine Meghalaya Pradesh Congress Committee Chief Vincent H Pala aganaha.
Mukul Sangma aro uni nokdangni manderangko Congress-ona re·baode nokchakaigen ine agangipa kattani bidingo CLP dilgipa Ronnie V Lyngdoh aro Tura MP, Saleng A Sangmani gisepo bak ong·grikenga ine nikani gimin MPCC chief ia kattarangko aganaha.
Party dilgiparangni dingtang dingtang dake chaniani gimin Pala indake aganaha je party-ona re·bana sikgiparangko darangkoba man·jawa ine aganjawa.
Chief Minister Conrad K Sangma-ni cabinet-ni bidingo aganengon, jeon 80 per cent minister-rangan Congress-ni gitcham dilgiparanganchim ine aganaha, jeba party-o napna man·a indiba AICC-sa jekoba aganchakgen.
Party-o aditan niamrang gnang, jeon Mukul Sangma aro uni nokdangko Congress-o napna on·gen ba on·jagen, chanchiani donggen, Pala aganaha.
Pala indakeba aganaha je Saleng Sangmani Tura Parliamentary seat-ko cheani ja·man intalan Meghalaya-o politics-ni a·baku dingtangna a·bachengaha, jeon party-ni mikkangchini gimin ka·dingstekgiparang Congress-ona re·bapilna gita sikgiparang dongengaha, Pala aganaha.
Meghalaya-o Congress party-ko bilakatpilna gita rake kam ka·na ka·dongataniko on·engon, Congress party bilakbapilode bang·a gitcham dilgiparangan party-ona re·bapilgen ineba ua aganaha.
Unomitingo batanggimin Lok Sabha election-o an·tangni ama cha·ani giminde Pala an·tangan chu·gimik dosiko ra·e aganaha.
