SHILLONG: Sombar salo, bijolini bidingo songni manderang baksa agangrikani program-ko Gambegre C&RD Block-ni ning·o donggipa Aminda Rangsa songo ong·atangaha aro program-ko ong·atanio a·dokni Power Minister Abu Taher Mondal, Power department-ni Commissioner & Secretary Sanjay Goyal aro dingtang dingtang official-rangba bak ra·angtokaha.
Ia tom·anio a·dokni Power Minister, jinmana aganprakengon, a·doko bijoliko nambate on·na gita sorkari kamrangko ka·engahani gimin bilsi bongani gisepon bijoliko songantinan chotchanggija on·na man·gnok ine ku·rachakaniko on·angaha.
“Iandakgipa program-rango officer-rang dongpae bak ra·on neng·nikanirangko chanchirimna man·a. Ia sal somoirango jillarango gitan songadam nokadamrangoba apsan obostako nikna man·engaha. Da·o bilsi bongani gisepon bijoliko songantion chotchanggija on·na man·gnok. Sub station-rangko nambate rikgnok aro voltage-rang nambatgnok. Da·o Damalgre-o gital sub-station-ko songengaha aro iako jagni ba jagittamni gisepon matchotgnok,” ine Mondal aganaha.
Gambegre-o bijoli gri ong·gipa damgittam songrang dongkuenga ine janapatengon, ia songo bijoliko on·na gita sorkari rake kamko ka·gen ine Power Minister ku·rachakaniko on·angaha.
Iana skang, a·dokni Power Minister, Power department-ni kamrangko aro Garo Hills-ni scheme-rangko nipilna gita dingtangmancha tom·aniko ong·atangaha aro Garo Hills-o mikkarang waani ja·man nosto ong·gipa pilak bijoli line-rangkon ta·rake taripile on·china officer-rangko didiangaha.
