SHILLONG: India a·songni gipin biaprangona bate salgro salaram a·dokrangon me·chikrang naljokaniko man·bata ine Sombar salo, National Commission for Women (NCW)-ni Chairperson Rekha Sharma a·kangataha.
Sombar salo, Non-Timber Forest Produce (NTFP)-o salgro salaram jolrango me·chikrangni bading chiwalanirangko tang·doatna gita Regional Capacity Building Workshop-ko ong·atanio bak ra·na gita Shillong-ona re·baanio NCW-ni Chairperson, ia kattarangko aganaha.
Sharma-ni aganani gitade, a·songni gipin biaprang, mongsongbate North India jolrango me·chikrangko ka·saninggija dake so·ote galani case-rang bang·en dongani gimin salgro salaram a·dokrangon me·chikrang naljokaniko man·batenga.
Indake ong·genchimoba, salgro salaram jolrango aro a·songni gipin biaprangoba me·chikrangni kosako ong·gija dakanirang dongjana gita Commission rakbee kamrangko ka·enga ine Sharma aganaha.
Meghalaya a·doko me·chik aro bi·sarangni kosako ong·gija dakanirangko bang·en nikna man·kuengani gimin sing·on, ia sal somoirango iandakgipa kamrangni bidingo manderangna mikrakatanirangko on·engahani gimin manderang, iandakgipa a·selrangko report ka·na gisik nangtokengaha ine NCW-ni Chairperson parakataha.
Me·chikrangni kosako ong·gija dakani case-rangko manderang mokordoma ka·na gisik nangbatengaha ine janapatengon, manderangna iandakgipa kamrangni bidingo mikrakataniko on·engani gimin media-ko aro iandakgipa kamrangko komiatna gita rakbee kamrangko ka·engani gimin MCW-ni Chairperson, police-rangkoba mittelpilangaha.
National Legal Services Authority (NALSA)-ni ning·o NCW, me·chikrangna on·gimin bilrangni bidingo ma·siate on·na legal awareness program-rangko a·song gimikon ong·atenga ineba Sharma parakataha.
