TURA: Dolgugre-oni Bazamara-ona dakanggipa ramao gital dolongko rikengahaoba, da·o gita wachini somoirango pangnan jolo songdongenggipa manderang neng·nikanirangko chagrongna nangrongani gimin ia song damgniko nangdimeatna gita subway-ko tarie on·china A·chik Conscious Holistically Integrated Krima (ACHIK) Rajabala unit dabiangaha.
ACHIK Rajabala unit-ni parakatani gitade, wachini somoio pangna bilsian Dolgugre aro Bazamara-ni gisepo ramarang champengatako man·rongani gimin da·o gital dolongko rikaniara namen dakchakani ong·gnok indiba wachini somoirango pangkamgipa re·a doani cholko on·na gitade ia biapo subway-ko tarianian nambatgipa ong·enga.
“Ia ramao rikenggipa dolong bakan matchotgnok aro ian jolo songdongenggipa manderangna dakchakani ong·gnok indiba Dolgugre aro Bazamara-ni gisepo champengataniko man·jana gita subway system-ko nangchongmotenga. Ia ramani gisepo subway-ko tarigenchimode ian wachini somoirangoba songni manderangna dakchakani ong·gen,” ine ACHIK Rajabala unit-ni vice president Kalcheng Ch Marak parakataha.
Ia song damgnini gisepo subway-ko tarichina ACHIK dolni dabianiko songni manderangba namnikpatokaha.
“Chinga pangna bilsian wachini somoirango re·a doani cholrang dongjae neng·nikanirangko man·ronga aro ia ramao subway-ko tarigenchimode ian chingna namen dakchakani ong·gen,” ine songni manderang parakataha.