BAGHMARA: Supreme Court-ni ge·etanio pangchake, ong·gija dakanirangko champengna man·na gita South Garo Hills a·jaoba CCTV camera-rangko chatahachim indiba ia CCTV camera-rang kam ka·jae maming namgnirangko on·na man·jaenga ine A·chik Conscious Holistically Integrated Krima (ACHIK) matnangataha.
Iani bidingo, Meghalaya a·dokni Director General of Police (DGP)-na badi ka·e sedoatengon, 2017 bilsini March 28 tariko Supreme Court-ni ge·etanio pangchake, South Garo Hills a·jaoba CCTV camera-rangko donahachim indiba ia CCTV camera-rang kam ka·jaengani gimin Supreme Court-ni ge·etaniko manigija gita ong·enga ine ACHIK-ni vice president Greneth M Sangma parakataha.
“Manderangna chel·chakaniko on·na, kacharini kamrangko nirokna aro niam retirangko rakkina miksonganiosa ia CCTV camera-rangko donahachim indiba CCTV camera-rang kam ka·jaengani gimin ian manderangna chel·chakaniko on·anio aro mongsongbate kacharini kamrango maming namgnirangko on·na man·jaenga,” ine Sangma parakataha.
Indake ong·engon, maini a·sel South Garo Hills-o chatgipa CCTV camera-rang kam ka·jaenga, uko am·sandichina, CCTV camera-rang name kam ka·na man·na gita nosto ong·gimin camera-rangko tarichina ba gitalko donskachina aro mikkangchi iandakgipa CCTV camera-rangko nirokjringchina gita ACHIK-ni vice president, a·dokni DGP-ko didiataha.
