NONGPOH: Mongolbar salo, Meghalaya Police-ni ning·o Unarmed Branch Recruit Constable-ni brigipa batch-ni passing out parade-ko Umran-o donggipa 6th Battalion Armed Police Training Centre-o ong·atangaha.
Ia passing out parade-ko ong·atanio, a·dokni Director General of Police (DGP) Idashisha Nongrang, mongsonggipa sokgipa ong·e bak ra·angaha aro unbaksana Meghalaya Police-ni dal·dalgipa officer-rangba bak ra·angaha.
Ia passing out parade-ko ong·atanio a·dokni DGP, gital constable-rangna aro police officer-rangna aganprakangengon, training-ko matchotanggipa sak 104 gital constable-rangna an·tangni namgipa skanirangko on·angenba, uamangna skang training-ko ra·e boksisrangko man·gipa sipairangoniko skie ra·china didiangaha.
“Ia sak 104 unarmed branch constable-rangan chingna rasongko ra·baaha. Da·alo anga na·simangko Meghalaya Police-ona rimchaksona kusi ong·bea. Ia training-o na·simangoni mitamrang boksisrangko man·aha aro ian gipinrangnaba dakmesokani ong·china. Jemangan boksisrangko man·pajaha, na·simangba boksisrangko man·e Meghalaya Police-na, an·tangtangna aro a·songna mikkim rasongko ra·bana gita bang·en cholrangko man·gen,” ine a·dokni DGP Nongrang aganaha.
Ia gital constable-rangna skie on·na gita rakbee kamrangko ka·ahani gimin ua dingtangmancha Armed Police Training Centre aro skie on·giparangkoba mittelpilangaha.
Gital constable-rang da·o kamtangtangko ra·na re·ongkatangengon, ia training-o skie ra·gimin kamrangko ja·rikna nanggnok ineba Nongrang aganaha.
Meghalaya Police-o kamko ka·engon, pangnan kakketgiparang ong·china aro namgipa gunrangko mesokchina gitaba a·dokni DGP, gital constable-rangko didiangaha.
