AMPATI: Mongolbar salo, a·dokni Water Resources Minister Comingone Ymbon, South West Garo Hills a·jaona re·baenba, chi banenggipa biaprangko niangaha aro uni ia biaprangko niangani somoio Salmanpara MLA Ian Botham K Sangma, Rangsakona MLA Subir Marak, SWGH a·jani Deputy Commissioner Hema Nayak, Superintendent of Police (SP) Vikash Kumar aro dingtang dingtang official-rangba dongpaaaha.
Chi banenggipa biaprangko nianganio a·dokni Water Resources Minister, Anangpara-ni Daru Flow Irrigation Project, Kalaipara songni Rongkai Flow Irrigation Project aro Purakhasia songni Darong chisamo a·a be·gipa baksana Bandoraja FIP-ko man·chape dingtang dingtang scheme-rangkoba niangjolaha.
Chi bangipa aro a·a be·gipa biaprango State Plan scheme-rangchi taripiltaianirangko kamrangko ka·china didiangengon, ma·mong sorkarini ra·gatgipa scheme-rangchi ia biaprango pangkamgipa kamrangko ka·china gitaba Ymbon didiangaha.
Water Resources, Ampati Division-o kam ka·giparang chu·ongjaengani gimin nangenggipa kamrangna ta·raken proposal-rangko on·atchina gita Minister, department-ni officer-rangko didiangaha.
Water Resources Minister-ni ia biaprangko niangani somoio dongpae bak ra·anggipa gipin manderangara, Water Resources-ni Chief Engineer AD Blah, Additional Chief Engineer L Sooting, Garo Hills Circle-ni Superintending Engineer MM Sangma, Water Resources Ampati-ni Executive Engineer Silningchi M Sangma aro gipinrang ong·a.
