TURA: Meghalaya a·dokni State Reservation Policy (SRP)-ko gital dake nipiltaina a·dok sorkari expert committee-ko songahani gimin ia reservation policy-ko taridapgija 1972 bilsioni ja·rikbaenga gitan apsan niamko ja·rikangkuchina North Garo Hills Job Reservation Policy Coordination Committee (NGHJRPCC)-ba expert committee-na ku·pattianiko on·ataha.
Iani bidingo NGHJRPCC-ni gita expert committee-na sedoatengon, a·dokni Reservation Policy-ko taridapgija 1972 bilsio Meghalaya a·dokko man·chengani somoio gitcham dilgiparangni suala gitan Garorangna 40%, Khasi-Jaintia-rangna 40% aro gipin jatrangna 20%-kon ja·rikangkuchina didiataha.
“Da·o dongenggipa Reservation Policy-ko taridapjachina chinga nangnikenga maina Meghalaya a·dokko man·chengdilgipa pagitchamrangan, Khasi-Jaintia aro Garorangni janggi tangani gadango pangchakesa ia niamko tariangaha,” ine NGHJRPCC-ni president Jagir M Sangma parakataha.
Ia Reservation Policy-ko mande jelbra jelsuanio pangchake ba biapni kri tarijaha ine janapatengon, Khasi-Jaintia-rang baksa tosusagenchimode ua somoio A·chikrang namen ja·manchakbatani giminsa a·doko mongsonggipa jatgittamna apsan bak rengsiko tikatna gita ia niamko pagitchamrang tariaha ine NGHJRPCC parakataha.
2022 bilsio Meghalaya State Government-o kam ka·giparangko Economics & Statistics Directorate-ni gita census ka·ani bidingo janapatengon, sorkario kam ka·giparang Khasi-Jaintiaoni sak 35,031 ong·e 61.69 percent ong·enga indiba Garorangonide sak 19,874-san ong·e 35 percent-ni gitasan ong·kuenga ine NGHJRPCC talataniko on·ataha.
“Meghalaya a·doko songdongenggipa jatgittam, chong·motan Khasi-Jaintia aro Garorangni gisepo Garorangan chol ong·batgijagipa aro ja·manchakbatgipa jat ong·a ine nikesa a·dokko man·e on·dilgipa pagitchamrang 1972 bilsini State Reservation Policy-o Garorangna 40%, Khasi-Jaintiarangna 40% aro gipinrangna 20 percent-ko chame on·ahachim indiba ia bak rengsionikon A·chikrang da·alona kingkingba chu·gimikko man·kujaengani gimin chinga Reservation Policy-ko gital dake taripilaniko raken jegala aro batesa A·chikrangni gimaatgipa bak rengsiko chu·gimik on·china chinga dabienga,” ine NGHJRPCC-ni president parakataha.